Heb 13 | KYG | STEP | Konagatapie'mo nelapaiya kava'mo o'ataletapa mago'e huno lapau lapayamopafi'mo lapaino.

Hebrews 13

Ina kava'mo hiyo, huno hu'niya gemae

1 Konagatapie'mo nelapaiya kava'mo o'ataletapa mago'e huno lapau lapayamopafi'mo lapaino. 2 Nata vaya'mo esagetapae'mo lapake okanitapa hapa maeta yagaitapa apateyo. Mago vaya'mogimo ani agufa kava'mo hu'a enisole vaya'mo hapa mae'a yagai'a apate'ne'apae'mo, enisole vaya'mo hapa mae'none, hu'a o'apake'nae. 3 Kalavusifi'mo ne'maiya vaya'aife'mo lapake kanitapa o'apataletapa lapakesamo afiyo. Apakae'e'mo magokepi'mo lokaeta kalavusi hu'negekana hutapa apakaefe'mo lapakesamo afiyo. Kalaisitefe'mo hanageke ya'mo ne'aliya vaya'aife'mo lapake kanitapa o'apataletapa lapakesamo afiyo, apakae'e'mo ma mopafi mai'netapae'mo hanageke ya'mo alisaya vaya'mo mai'naya'mofe'mae.

4 Muki vaya'mogimo a'mo alige vele'mo maige nehaya kavafe'mo ala agimo ne'ami'apae'mo, kanale kava'mo hane'niye, hu'a hisaya kava'mo hane'niya'monanafa Goti'a kumai kava'mo nehaya vaya'e yafa'mo nehavaya vaya'e'mo agoti huno apategaiya'mofe'mo veyalavemogimo kava'apimo ali'a hosu hu'a o'ateyo. 5 Lapa'ye osino. Ali'naya yafeke'mo, alagi haneno late'niye, hutapa lapakesamo ne'afitapa lapaipamo'mo falu hino. Na kava higetapaene. Agai'amo huno'ae'mo,muki afina'mo olapatale'na lapakae'e'mo magokepi lokae'na maige maige hu'na mai'ne'na lapa magauve, huno hu'niya'mofe'mae. 6 Huno hu'niya'mofe'mo koli osuta lokiya gemo hutae'mo,

Ala kava ne'mo'a laha ne'maeya vekamo mai'niye. Koli osugune. Ma mopafi vaya'mogi lagaetegamo na kava'mo hugae, huta hugune.
7 Yagai'a lapate'ne'a Goti ge'amo lapa pai'naya vaya'aife'mo lapakesamo afiyo. Alagepa kava'mo hute'a u'a ka atupale'mo ava'yi hu'nae, hutapa lapakesa afifi nehutapae'mo apakesa afi'a fatago hu'naya kava'apimo apakame hutapa hiyo. 8 Yesu Kalaisi'a alu afina alu afina'mo alu kava'mo huno no'maifa akeya'vilaga mai'niya kava huno ne'maiyanageno henaga'amo ani agufa kavake'mo huno maigiye. 9 Hosu kavanage'a mago vaya'mogi aeto aeto agufa geleti'mo lapayate'mo he'a lapavayu huli'a ugayanagi ehetapiye. Alagepa kavanageno Goti'a fiku lapa maeno nelapamiya gemo'a lapaipa lapakesamo alino lokiya vaino lapategaiye. Ne'yafe'mo, neyo, hu'a huge o'neyo, hu'a huge nehaya gemo'a lapaipa lapakesamo alino lokiya vaino olapategaiye. Ani gemo akame nehaya vaya'mo hapa o'mae'niye. 10 Lagae ofalinimo hane'niye. Inagi lagae ofalinimo hi'yalamuteti'mo alita ne'nona'monanafa mono hu'a ne'apataya vaya'mogi seli nopi'mo ali'ya'mo ne'aliya vaya'mo lagae hi'yalamuteti'mo afa'a ali'a o'negae. 11 Na agufa kava'mo nehaya'mofe'mae. Mono hu'a ne'apataya vaya'mogimo hosu kava'apilefe'mo afumo amagite'a kola'mo laki'a alini'a mono nopi'mo fale'a hai'naya'monanafa afumogi apakufa'amo alini u'a taonimo lafi kegi'ya malagamo atafi'mo nekae. 12 Ani kava'mo nehageno'ae'mo Yesu'a vaya'amo kola'aleti'mo apavaleno alino apaote'mo apatesiyafe'mo taonimo lafi kegi'ya malagamo uno fali'niye. 13 Apakame'ya ami'nageno hosu vekagana huno mai'nige'apae'mo lafi kegi'ya malagamo avaleli'u'a amagi'naya'mofe'mo apakame'ya lamisayafe'mo agaetegamo lafi kegi'ya malagamo vigetao. 14 Hanege hanege huno hanesiya taonimo ma mopafi'mo ohane'niya'monanafa afole aisiya taonifi'mo maisunafe'mo agava ne'maune. 15 Inagi lagaemo agaeteti'mo muki afina'mo Goti'mo ofalinimo ne'amitae'mo agi'ale'mo alita asaga huta ne'atetae'mo hao ke hegetao. Lavayafatike'mo ani ofalinimo amigetao. 16 Ne'amitetapae'mo alagepa kava'mo huge hapa maetapa apamige hisayafe'mo lapake okanino. Goti'a ani agufa ofalinimo ne'amiya kavafe'mo lusi kava huno nehaiye. 17 Lapakaemo yagai'a nelapataya vaya'ai apaiyafi'mo mai'netapa ge'apimo afiyo. Apakaemo lapakupi mafa'nele'mo yagai'a ne'ataya ali'ya'apilefe'mo Gotife'mo ha paigae. Ge'apimo afige'apao apaipamo'mo kana osu'nisige'a apamogaga ai'a ali'ya'mo aliyo. Apaipamo'mo kana hisiya kava'mo'a lapa o'maegaiye.

18 Nunumu hutapa lateyo. Lagaemo muki kavatefe'mo, alagepa kava'mo hugesune, huta lole lagesamo o'afita magoke lagesamo afi'netae'mo, lagupi mafa'nemo'a hosu kava'mo nehae, huno laha nopaigeta alagepa huta ne'maune. 19 Aise afina'mo utesige'na lapakaetegamo visuvafe'mo nunumu hutapa lateyo, hu'na lokiya gemo hu'na lapa nepauve.

Nunumu hu'niya gemae

20 Goti'mo Ala kava netimo Yesu'a hogote vekamo sipisipile'mo yagaino ne'apateya vekamo kola'aleti'mo hanege hanege huno hanesiya kotalake gemo hu male'niya kola'aleti'mo fali'niyateti'mo ago alino he tino ate'niye. Nagaemo Goti'a alino nanu aeno late'niya vekae'mo nunumu hu'nae'mo, 21 Muki alagepa kavafe'mo kahau'nisiya kava'mo hisayafe'mo alagi alika alagepa huka apato. Yesu Kalaisiteti'mo apaipafi'mo ali'ya'mo alige'apao kahau'nisiya kava'mo hiyo. Kagikale'mo alita asaga huta katenageka ala kagi vekamo maige maige huka maiyo. He, lama ge.

Ge atupa gemae

22 Konaga'nimogitapae, yatala gemo avo okae'novana lapaipamo alino lokiya vaino lapatesiya gemo afitetapae'mo alaga'mo olapae'ninagetapa lapaipamo'mo falu hino. 23 Afiyo, konagatimo Timoti'mo kalavusifati'mo ago hatu mae'a ate'nae. Agaemo nagaetegamo malage huno esige'na lapakaetegamo avaleli'na uta'a lapakegau'ae. 24 Lapakaemo yagai'a nelapataya vaya'e muki Goti apaote vaya'a'efe'mo ge apamamaeyo. Itali kotega vaya'mogimo ge lapamamae'nae. 25 Goti'a muki vaya'amogitapamo fiku lapa maeno lapamino. He, lama ge.